منتديات انفاس الحب - يارفيف الما

يارفيف الماء وفجر العيد واحزان المواني
يااكثر اهل الارض طيبة قلب واسرار دفينه

المكان اللي هنا مليان ظحكات واغاني
والكلام اللي بغيت اقول يحتاج لسكينه

شوفي الركن البعيد هناك كنه صدر حاني
هذا هو اللي يليق بشاعر وبنت حزينه

انسي الشارع وعتمات الزوايا والمباني
هاتي يدينك نلف الغيم ونشكل مدينه

عندي الليله كلام وصمت واخاف الثواني
تظلمه او تظلم اللي فيه كم ضاعت سنينه

بس لازم تسمعين اللي ابي وإلّا تراني
لو بعيده لك نسيت ورحت اقول اللي تبينه

شي واحد قبل ماابدأ مابي اي شي ثاني
يخطر في بالك وانا اكشفلك شعور تجهلينه

ان انا وبكل ماتحمله احبك من معاني
كنت وراح ابقى احبك لين مدري وش هو لينه

بس والله ماقدرت انسى ولا همي نساني
لاذكرت انسان فيه اسرار مابينك وبينه

كل ماتطري علي فكرة هواك الأولاني
اشعر اني انطعن مليوون مرة من يدينه

اشعر ان عيونك الله ماخلقها الا عشاني
كيف كانت تبتسمله قولي انك تخدعينه

صورة انه كان يمسح دمعك تزلزل كياني
وكيف كان يلم شعرك ويتبعثر في يمينه

حتى اسمك يوم رحت ادللـه حظي رماني
نفس الاسم اللي يقول بذمتك ماهي غبينه

وكني اللي كل مااناديك بالاسم الفلاني
اطلب النسيان يترك منه شي تذكرينه

لاتظنيني اناني لا انا ماني بأناني
لو سلمت من الغرق بموت في ظهر السفينه

يا اني مااكمل واعاني او اكمل ثم اعاني
كل مااسمع طاري اسمه او تجي عيني في عينه

ايّنا كان الضحيه وايّنا اللي كان الجاني
مدري ولكن قراري لازم انك تقبلينه

مثل مااكره فكرة انه واحد ياخذ مكاني
مااقدر اجلس في مكان انسان كنتي تعشقينه

https://6.top4top.net/m_1423ltbnn0.mp4