مساءو عسل حبايبي
كيفكم
جبتلكم اليوم عجينة الزعتر الاخضر
هالعجينة انا متعلميتها
من امي الله يطول بعمرها
كثير سهلة و زاكية جداً
والوصفة حصرية من مطبخي لعيونكم
وهلأ كالعادة رح احكيلكم المقادير
والطريقة مع بعض
يللا اتفضلوا معي
بحتاج كمية من الزعتر الاخضر
هالزعترات مزروعين عندي ع البلكونة
قصيتهم و فرفطتهم وبعدين
غسلتهم كثير منيح وتركتهم ينشفوا
من المي لحتى احضر للعجينة
للعجينة بحتاج
كوب ونص من الحليب السائل الدافي
نص كوب لبن زبادي بحرارة المطبخ
نص كوب زيت زيتون
2 ملعقة كبيرة سكر
2 ملعقة كبيرة خميرة
حطيت عليهم 6 أكواب طحين
و ملعقة صغيرة ملح
و ملعقة صغيرة بيكنج باودر
و 2 كوب من الزعتر الاخضر
عجنتهم مع بعض كثير منيح
لصارت معي عجينة
ناعمة وطرية
تركتها ترتاح لمدة نص ساعة
ما احتاجت اكثر
لانه الجو كثير شوب
وهيك شكلها لما ارتاخت واختمرت .
قطعتها كرات و حشيتها
المثلثات بالجبتة
والاصابع بحشوة لبنة ومخلل
وممكن مانحشيها نخليها كرات
ودهنتهم بزيت الزيتون
ورشيت عليهم سمسم
وتركتهم يرتاحو مدة ربع ساعة
قبل مادخلتهم الفرن
بخبزهم بفرن حامي على الرف الاوسط
على درجة 200 ولمدة ربع ساعة
او حتى يصيروا الاطراف ذهبية
وبعدين تحت الشواية
واخر اشي بدهنهم
كمان مرة بزيت الزيتون
وهيك صاروا جاهزين للاكل
وصحتين وهنا ..
يارب تعجبكم هالوصفة وتجربوها
وانتظروني بوصفات قادمة